Njerëzit me ekspozim më të madh ndaj ndotjes së ajrit janë në rrezik në rritje për të zhvilluar sëmundjen e Alzheimerit.

Sa më sipër raportohet në studimin e ri nga studiuesit në Universitetin Amerikan Emory, të botuar në revistën me qasje të hapur "PLOS Medicine".

Ndotja e ajrit dhe sëmundja e Alzheimerit

Sëmundja e Alzheimerit është forma më e zakonshme e demencës, që prek rreth 57 milionë njerëz në mbarë botën. Ekspozimi ndaj ndotjes së ajrit është tashmë një faktor rreziku i njohur si për sëmundjen e Alzheimerit ashtu edhe për sëmundje të tjera kronike të zakonshme, të tilla si hipertensioni, goditja në tru dhe depresioni.

Këto gjendje lidhen edhe me sëmundjen e Alzheimerit, por deri më tani nuk ishte e qartë nëse ndotja e ajrit çon fillimisht në shfaqjen e këtyre sëmundjeve kronike, të cilat më pas rrisin rrezikun e demencës, apo nëse këto sëmundje intensifikojnë efektet e ndotjes në shëndetin e trurit.

Ekipi kërkimor i Universitetit Emory analizoi të dhëna nga më shumë se 27.8 milionë përfitues të Medicare të moshës 65 vjeç e lart nga viti 2000 deri në vitin 2018. Shkencëtarët shqyrtuan nivelet e ekspozimit të pjesëmarrësve ndaj ndotjes së ajrit dhe nëse ata u diagnostikuan më pas me sëmundjen e Alzheimerit, me theks të veçantë në rolin e sëmundjeve të tjera kronike.

Ata zbuluan se ekspozimi më i lartë ndaj ndotjes së ajrit shoqërohej me një rrezik në rritje të sëmundjes së Alzheimerit dhe kjo lidhje ishte pak më e fortë tek njerëzit që kishin pësuar goditje në tru. Në të kundërt, hipertensioni dhe depresioni duket se kishin një efekt të vogël shtesë.

Njerëzit me ekspozim më të madh ndaj ndotjes së ajrit janë në rrezik më të lartë për të zhvilluar sëmundjen e Alzheimerit

Në përgjithësi, gjetjet sugjerojnë që ndotja e ajrit kontribuon në sëmundje kryesisht përmes mekanizmave të drejtpërdrejtë që ndikojnë në tru, dhe jo në mënyrë indirekte përmes sëmundjeve të tjera kronike. Megjithatë, njerëzit me një histori goditjeje në tru mund të jenë veçanërisht të prekshëm ndaj efekteve të dëmshme të ndotjes në shëndetin e trurit. Studimi sugjeron që përmirësimi i cilësisë së ajrit mund të jetë një masë e rëndësishme për të parandaluar demencën dhe për të mbrojtur të moshuarit.

Ndër kufizimet e studimit, studiuesit përmendin keqklasifikimin e mundshëm të ekspozimit të pjesëmarrësve ndaj ndotjes së ajrit për shkak të vlerësimeve të përqendrimit të lëndës grimcore PM2.5 në zona të ndryshme.

/Motilokal.com