"Vetëm" 1.000 vjet dritë larg, astronomët nga Observatori Jugor Evropian (ESO) kanë zbuluar një vrimë të re të zezë, më të afërt me Tokën që është zbuluar ndonjëherë, e ndodhur në një sistem yjor të dukshëm me sy të lirë, sipas një studimi të botuar të mërkurën.

“Është një vrimë e zezë yjore, e krijuar nga shembja e një ylli masiv mbi vetvete, aq e madhe sa të paktën katër herë Dielli. Për dallim nga vrimat e zeza supermasive, ajo është "e heshtur" sepse "nuk bashkëvepron dhunshëm me mjedisin e saj" (nuk thith materien): prandaj është "me të vërtetë e zezë" dhe fshihet në sistemin e yjeve "HR 6819”, tha ESO në një njoftim për shtyp, transmeton AFP.

Ekipi ESO fillimisht ishte i interesuar për HR 6819 si një sistem binar yjesh, i cili përfshin një larmi yjesh më masive dhe më të ndritshme se Dielli. Falë spektrografit (instrument i cili lejon të matë shpejtësinë radiale të një objekti) "FEROS", e vendosur në vëzhgimin e La Silla (Kili), astronomët kanë vërejtur se njëri prej dy yjeve po ecën më shpejt se tjetri.

Duke studiuar këtë trajektore, ata ishin në gjendje të zbulonin praninë e vrimës së zezë, dhe të llogaritnin masën e saj. "Një objekt i padukshëm me një masë të paktën katër herë sa Dielli mund të jetë vetëm një vrimë e zezë", shpjegon astrofizikani Thomas Rivinius, autori kryesor i studimit të botuar në revistën Astronomy & Astrophysics.

"Ky yll përmban vrimën më të afërt të zezë me Tokën për të cilën ne dimë", tha ai.

"Ne u çuditëm plotësisht kur kuptuam se ishte sistemi i parë yjor i dukshëm me sy të lirë pa një vrimë të zezë", shton Petr Hadrava, nga Akademia e Shkencave në Pragë, bashkautorë i studimit.

Sipas studimit vetëm dy duzina vrima të zeza janë zbuluar në galaktikën tonë, e cila përfshin në qendër të saj një vrimë të zezë supermasive.

"Ne dimë pak për vrima yjore në Rrugën e Qumështit, por mendojmë se ka shumë, sepse ato janë produkte natyrore të evolucionit të yjeve masivë", komenton Pierre Kervella, astronom i Observatorit të Parisit - PSL, në një intervistë për AFP./Motilokal.com