Inspektorati Qendror i Mbikëqyrjes së Tregut (IQMT), në kuadër të Ministrisë së Industrisë, Ndërmarrësisë, Tregtisë dhe Inovacionit, ka njoftuar se është duke zhvilluar mbikëqyrje intensive në tregun e derivateve të naftës në Kosovë. Kjo po bëhet për të monitoruar zbatimin e vendimit për rregullimin e përkohshëm të çmimeve dhe vendosjen e masave mbrojtëse, të nënshkruar më 4 mars 2026 nga ministrja Mimoza Kusari Lila.
Sipas njoftimit, qëllimi i këtij vendimi është mbrojtja e konsumatorëve, rritja e transparencës në treg, garantimi i konkurrencës së ndershme dhe shmangia e çrregullimeve në tregun e karburanteve.
IQMT ka bërë të ditur se, së bashku me Administratën Tatimore të Kosovës, është duke analizuar të dhënat që lidhen me çmimet e importit dhe çmimet që u ofrohen konsumatorëve në tregun vendor.
Sipas evidencave zyrtare të siguruara nga Dogana e Kosovës, çmimi mesatar i importit për derivatet e naftës gjatë ditës së shtunë, më 7 mars 2026, ka qenë:
- Naftë (dizel): 1.40 euro për litër
- Benzinë: 1.14 euro për litër
Ndërkohë, nga monitorimi në tregun vendor, çmimet e ekspozuara për konsumatorët në pikat e shitjes me pakicë rezultojnë:
- Naftë (dizel): nga 1.39 deri në 1.55 euro për litër
- Benzinë: nga 1.27 deri në 1.32 euro për litër
Vendimi i 4 marsit përcakton edhe marzhën maksimale të lejuar tregtare. Ajo është:
- 2 euro centë për litër për shitjen me shumicë
- 12 euro centë për litër për shitjen me pakicë
Marzha tregtare nënkupton diferencën mes çmimit të shitjes dhe çmimit të furnizimit.
Sipas IQMT-së, inspektorët kanë qenë në terren gjatë vikendit dhe edhe në ditët e javës së kaluar. Kontrollet do të vazhdojnë në bashkëpunim me Administratën Tatimore të Kosovës, Doganën e Kosovës dhe Autoritetin e Konkurrencës së Kosovës.
Institucioni paralajmëron se në çdo rast kur identifikohen parregullsi, si mosrespektimi i marzhës së lejuar apo praktika që dëmtojnë konkurrencën dhe konsumatorët, do të ndërmerren masa sipas legjislacionit në fuqi.
IQMT ka bërë të ditur se qytetarët e Republikës së Kosovës do të informohen me kohë për çdo zhvillim të mëtejmë në tregun e derivateve të naftës.
/Motilokal.com
