Marsi i vitit 2026 është renditur si marsi i katërt më i ngrohtë në nivel global, sipas të dhënave nga sistemi klimatik ERA5. Temperatura mesatare e ajrit në sipërfaqe arriti në 13.94°C, që është 0.53°C mbi mesataren e periudhës 1991–2020. Rekordi mbetet marsi i vitit 2024.

Krahasuar me nivelin para-industrial të viteve 1850–1900, marsi i këtij viti ishte 1.48°C më i ngrohtë, duke reflektuar vazhdimin e trendit të rritjes së temperaturave globale.

Në Evropë, marsi 2026 ishte i dyti më i ngrohtë i regjistruar ndonjëherë. Temperatura mesatare arriti në 5.88°C, ose 2.27°C mbi mesataren e zakonshme për këtë muaj. Rekordi evropian mbahet nga marsi i vitit 2025.

Pothuajse i gjithë kontinenti përjetoi temperatura mbi mesataren, me ngrohje më të theksuar në Rusinë veriperëndimore, Fenoskandinavinë veriore dhe shtetet baltike. Në kontrast, temperatura pak më të ulëta se mesatarja u regjistruan në Turqi, pjesë të Evropës Jugore dhe në Islandë.

Jashtë Evropës, temperaturat mbi mesataren u shënuan në Shtetet e Bashkuara, sidomos në perëndim të vendit ku një valë e fortë të nxehti zgjati deri në dy javë dhe theu disa rekorde për muajin mars. Gjithashtu, kushte më të ngrohta u regjistruan në pjesën më të madhe të Arktikut, në Rusinë verilindore dhe në disa zona të Antarktidës.

Në anën tjetër, temperatura më të ulëta se mesatarja u regjistruan në Alaskë, Kanada, Groenlandën jugore dhe Siberinë veriperëndimore.

Edhe temperaturat e sipërfaqes së detit mbetën në nivele shumë të larta. Mesatarja për marsin 2026 ishte 20.97°C, duke e bërë këtë muaj të dytin më të ngrohtë të regjistruar ndonjëherë për këtë tregues. Rekordi mbetet marsi i vitit 2024, gjatë fenomenit El Niño.

Të dhënat tregojnë se temperaturat e detit janë rritur gradualisht gjatë gjithë muajit dhe po afrohen me nivelet rekord të viteve të fundit. Sipas parashikimeve të qendrave klimatike, një rikthim i kushteve të El Niño pritet në gjysmën e dytë të këtij viti.

Në një perspektivë më të gjerë, periudha 12-mujore nga prilli 2025 deri në mars 2026 rezulton 0.55°C mbi mesataren e viteve 1991–2020 dhe 1.43°C mbi nivelin para-industrial, duke konfirmuar trendin e qëndrueshëm të ngrohjes globale.

/Motilokal.com