Dielli është sinonim i verës, por ekspozimi i zgjatur ndaj rrezeve të tij mund të shkaktojë dëmtime në lëkurë. Skuqja, ndjesia e djegies, irritimi dhe ndjeshmëria e shtuar janë ndër shenjat më të zakonshme të djegies nga dielli. Në këto raste, veprimi i shpejtë është i rëndësishëm për të lehtësuar simptomat dhe për të ndihmuar rikuperimin e lëkurës.

Sipas ekspertes Cynthia Cobb, PhD, e cituar nga Healthline, aloe vera përdoret prej mijëra vitesh për trajtimin e problemeve të ndryshme të lëkurës dhe njihet gjerësisht si “bima e djegieve”. Sot, edhe studimet shkencore mbështesin vetitë e saj qetësuese dhe anti-inflamatore.

Pse aloe vera është efektive?

Ekspozimi i tepërt ndaj rrezatimit ultravjollcë (UV) dëmton qelizat e lëkurës. Si reagim, organizmi aktivizon sistemin imunitar për të larguar qelizat e dëmtuara, proces që shoqërohet me inflamacion, skuqje, dhimbje dhe ndjesi djegieje.

Ekspertët theksojnë se aloina, një nga përbërësit aktivë të aloe verës, ka veti anti-inflamatore që ndihmojnë në qetësimin e lëkurës së irrituar. Gjithashtu, aloe vera ndihmon në hidratimin e lëkurës, duke reduktuar tharjen dhe zhveshjen që shfaqet shpesh pas djegieve nga dielli.

Si të përdorni aloe verën?

Për rezultate sa më të mira, aloe vera mund të aplikohet në dy mënyra:

• Direkt nga bima – Prisni një gjethe aloe vera dhe aplikoni xhelin e tejdukshëm mbi zonën e prekur.
• Në formë xheli të gatshëm – Zgjidhni produkte me përmbajtje sa më të lartë aloe vera, idealisht 100% të pastër. Shmangni produktet që përmbajnë aroma, ngjyrues apo substanca të tjera që mund të irritojnë lëkurën.

Një këshillë shtesë nga ekspertët është ruajtja e xhelit në frigorifer, pasi freskia e tij ofron një efekt më qetësues dhe lehtëson ndjesinë e djegies.

Çfarë duhet të bëni menjëherë pas djegies?

Përveç përdorimit të aloe verës, rekomandohet:

• Të bëni një dush të freskët ose të vendosni kompresa të ftohta.
• Të pini mjaftueshëm ujë për të shmangur dehidratimin.
• Të përdorni medikamente anti-inflamatore sipas nevojës dhe këshillës së mjekut.
• Të mos shpërtheni flluskat e krijuara, pasi kjo rrit rrezikun e infeksionit.

Kur duhet të kërkoni ndihmë mjekësore?

Megjithëse aloe vera mund të jetë shumë efektive për djegiet e lehta dhe të moderuara, ajo nuk zëvendëson trajtimin mjekësor në rastet më serioze.

Ndihma mjekësore duhet kërkuar menjëherë nëse djegia shoqërohet me ethe, marramendje, të përziera, të vjella ose nëse flluskat mbulojnë një pjesë të madhe të trupit. Po ashtu, djegiet e thella që prekin shtresat më të thella të lëkurës konsiderohen urgjencë mjekësore dhe nuk duhet të trajtohen në kushte shtëpie.

Aloe vera mbetet një nga zgjidhjet natyrale më të përdorura për qetësimin e lëkurës së djegur nga dielli. Megjithatë, specialistët kujtojnë se mbrojtja më e mirë është parandalimi: përdorimi i kremrave mbrojtës, shmangia e ekspozimit gjatë orëve me rrezatim të lartë dhe hidratimi i vazhdueshëm gjatë ditëve të nxehta të verës.

/Motilokal.com