Organizata “Ta Pastrojmë Kosovën” ka reaguar ndaj gjendjes së rënduar mjedisore pranë digës së Liqenit të Badovcit, duke ngritur alarmin për rikthimin e mbeturinave në këtë zonë.

Përmes një postimi në rrjetet sociale, organizata kujton se më 22 mars, në Ditën Botërore të Ujit, aty ishte zhvilluar një aksion i gjerë pastrimi me pjesëmarrjen e vullnetarëve, institucioneve, organizatave, mediave dhe qytetarëve, gjatë të cilit u larguan sasi të konsiderueshme mbeturinash. Megjithatë, vetëm pak muaj më vonë, zona është përballur sërish me të njëjtin problem.

“Pamjet flasin vetë”, thuhet në reagimin e organizatës, e cila vlerëson se aksionet vullnetare, sado të rëndësishme, nuk mjaftojnë për të zgjidhur një problem që përsëritet vazhdimisht.

“Ta Pastrojmë Kosovën” u ka bërë thirrje institucioneve përgjegjëse që të ndërmarrin masa konkrete dhe të menjëhershme për mbrojtjen e kësaj hapësire, duke kërkuar më shumë kontroll, parandalim të ndotjes, ndëshkim të ndotësve dhe zbatimin e zgjidhjeve afatgjata.

Organizata ka paralajmëruar se do të organizojë një tjetër aksion pastrimi, por thekson se përgjegjësia për ruajtjen e mjedisit nuk mund të mbetet vetëm mbi supet e vullnetarëve.

/Motilokal.com