Kupa e Botës 2026 ka vendosur një rekord të ri historik, duke u bërë edicioni me më shumë gola të shënuar ndonjëherë në historinë e Kampionateve Botërore.

Rekordi u thye mëngjesin e së premtes gjatë ndeshjes së Grupit D mes Shteteve të Bashkuara dhe Turqisë, kur Auston Trusty realizoi golin e 173-të të turneut, duke kaluar rekordin e mëparshëm prej 172 golash, i vendosur në Botërorin e Katarit më 2022.

Ajo që e bën këtë arritje edhe më të veçantë është fakti se rekordi i ri u vendos pas vetëm 59 ndeshjesh të zhvilluara. Në Botërorin e Katarit, shifra prej 172 golash u arrit vetëm pas përfundimit të të gjitha 64 ndeshjeve të turneut.

Botërori 2026 është edicioni i parë që zhvillohet me 48 kombëtare, në vend të 32, duke e zgjeruar ndjeshëm formatin e garës. Në total do të luhen 104 ndeshje, plot 40 më shumë se në edicionin e kaluar, çka krijon më shumë mundësi për gola dhe spektakël.

Për rekordin e ri reagoi edhe presidenti i FIFA-s, Gianni Infantino.

"Thyerja e rekordit të Katarit prej 172 golash nënvizon emocionin dhe lojën sulmuese që e kanë bërë tashmë Kupën e Botës 2026 të paharrueshme", shkroi Infantino në një postim në Instagram.

Me shumë ndeshje ende për t'u zhvilluar, numri i golave pritet të rritet edhe më tej, duke e bërë Botërorin 2026 edicionin më produktiv në aspektin ofensiv në historinë e futbollit botëror.

/Motilokal.com