Lodhja, dhimbja e kokës, urina e errët dhe përgjumja gjatë ditëve të nxehta nuk janë gjithmonë pasojë e lojës apo e qëndrimit në diell. Në shumë raste, këto mund të jenë shenjat e para të dehidrimit – një gjendje që, nëse neglizhohet, mund të ndikojë edhe në funksionimin e veshkave.

Vera sjell më shumë kohë në plazh, pishinë dhe aktivitete në natyrë. Fëmijët vrapojnë, luajnë dhe argëtohen për orë të tëra, shpesh pa e kuptuar se organizmi i tyre po humb sasi të mëdha lëngjesh. Edhe kur prindërit u ofrojnë ujë, përgjigjja është e njohur: "Nuk kam etje."

Megjithatë, ekspertët paralajmërojnë se etja nuk është gjithmonë treguesi më i mirë i nevojës për ujë. Sidomos gjatë lojës, fëmijët shpesh e shpërfillin këtë ndjesi, ndërsa dehidrimi zhvillohet gradualisht dhe pa simptoma të dukshme në fillim.

Kur rreziku është më i madh?

Mungesa e lëngjeve bëhet më problematike gjatë temperaturave të larta, aktiviteteve sportive, qëndrimit në plazh, udhëtimeve të gjata, si dhe te fëmijët me temperaturë, diarre ose të vjella.

Uji nuk shërben vetëm për të shuar etjen. Ai është thelbësor për rregullimin e temperaturës së trupit, transportin e lëndëve ushqyese dhe funksionimin normal të veshkave, të cilat filtrojnë dhe largojnë mbetjet nga organizmi.

Kur trupi humb më shumë lëngje sesa merr, zvogëlohet sasia e gjakut që arrin në veshka. Si pasojë, organizmi përpiqet të kursejë çdo pikë uji: urinimi rrallohet, urina errësohet dhe veshkat detyrohen të punojnë nën ngarkesë më të madhe.

Në shumicën e rasteve, dehidrimi i lehtë korrigjohet shpejt me marrjen e lëngjeve. Por nëse mungesa e ujit vazhdon, mund të shfaqen çrregullime të përkohshme të funksionit të veshkave, ndërsa rastet më të rënda mund të kërkojnë trajtim spitalor.

Cilët fëmijë janë më të rrezikuar?

Rreziku është më i lartë te:

• foshnjat dhe fëmijët e vegjël;
• fëmijët me sëmundje kronike të veshkave;
• ata me temperaturë të lartë, diarre ose të vjella;
• fëmijët që merren intensivisht me sport gjatë vapës.

Shenjat që nuk duhen neglizhuar

Simptomat e para të dehidrimit shpesh janë të lehta dhe mund të ngatërrohen me lodhjen nga loja. Prindërit duhet të jenë të kujdesshëm nëse fëmija:

• urinon më rrallë se zakonisht;
• ka urinë me ngjyrë të verdhë të errët;
• ankohet për dhimbje koke;
• duket i lodhur ose pa energji;
• ka gojë dhe buzë të thata;
• bëhet nervoz ose tepër i përgjumur.

Te foshnjat, shenja alarmuese mund të jenë pelenat që mbeten të thata për një kohë të gjatë, sytë e futur dhe ulja e aktivitetit.

Edhe në pishinë apo në det mund të dehidrohen

Një nga keqkuptimet më të zakonshme është se fëmijët nuk mund të dehidrohen kur qëndrojnë në ujë.

Në fakt, gjatë notit, lojës në plazh apo aktiviteteve sportive, organizmi vazhdon të djersijë. Humbja e lëngjeve ndodh edhe në ujë, ndaj ekspertët këshillojnë që fëmijëve t'u ofrohet ujë rregullisht, edhe nëse nuk e kërkojnë.

Kur duhet kërkuar ndihmë mjekësore?

Ndihma mjekësore duhet kërkuar menjëherë nëse fëmija:

• nuk mund të mbajë lëngjet për shkak të të vjellave;
• urinon shumë rrallë;
• është tepër i përgjumur ose i hutuar;
• ka gojë shumë të thatë dhe sy të futur;
• refuzon të pijë ujë.

Reagimi i shpejtë në këto raste mund të parandalojë komplikime serioze.

Ndërsa prindërit kujdesen të mos harrojnë kremin mbrojtës, kapelën apo rrobat e banjës, mjekët kujtojnë se "aksesorja" më e rëndësishme e verës mbetet një shishe me ujë.

Mesazhi është i qartë: fëmija nuk do ta kërkojë gjithmonë ujin kur organizmi ka nevojë për të. Prandaj, prindërit duhet t'ia ofrojnë rregullisht, pa pritur që të shfaqet etja. Disa gllënjka në kohën e duhur mund të shmangin një problem shëndetësor shumë më serioz.

/Motilokal.com