Tregu mobil është rikthyer në kryeqytet, duke sjellë përsëri prodhimet vendore më pranë qytetarëve të Prishtinës.

Drejtoresha e Bujqësisë në Komunën e Prishtinës, Jeta Rafuna, ka bërë të ditur se ky treg ka për qëllim të krijojë një lidhje më të drejtpërdrejtë mes fermerëve dhe konsumatorëve, duke u mundësuar qytetarëve të blejnë produkte të freskëta vendore.

Tregu mobil do të funksionojë tri herë në javë në tri nga sheshet kryesore të kryeqytetit: “Zahir Pajaziti”, “Bill Klinton” dhe “Adem Jashari”.

“Si Drejtori e Bujqësisë, do të vazhdojmë të punojmë për krijimin e kushteve sa më të mira për fermerët dhe prodhuesit vendorë, sepse besojmë se një bujqësi e fortë është themel i një kryeqyteti të zhvilluar”, ka deklaruar Rafuna.

Ajo ka ftuar qytetarët që ta vizitojnë tregun mobil, të zgjedhin produkte të freskëta vendore dhe përmes blerjeve të tyre të mbështesin punën e fermerëve.

“Së bashku, forcojmë bujqësinë vendore dhe zhvillimin e qëndrueshëm të kryeqytetit”, ka shkruar Rafuna në njoftimin e saj.

/Motilokal.com