Agjencia për Mbrojtjen e Mjedisit të Kosovës ka bërë thirrje për kujdes të shtuar gjatë sezonit të verës, duke kërkuar nga qytetarët që të tregojnë përgjegjësi në mbrojtjen e pyjeve dhe mjedisit nga zjarret.

Gjatë vitit të kaluar, Kosova u përball me dhjetëra vatra zjarri që shkaktuan dëme të konsiderueshme në pyje, kullota, toka bujqësore, prona dhe në pasuritë natyrore të vendit. Shumë prej këtyre zjarreve u shkaktuan nga pakujdesia njerëzore, ndërsa përhapja e tyre u favorizua nga temperaturat e larta, thatësira dhe erërat e forta.

Me fillimin e periudhës së temperaturave të larta edhe këtë verë, autoritetet theksojnë se secili qytetar ka një rol të rëndësishëm në parandalimin e zjarreve dhe ruajtjen e natyrës.

Mbrojtja e mjedisit nuk duhet të shihet vetëm si një detyrim ligjor, por si një përgjegjësi morale dhe qytetare ndaj vendit ku jetojmë. Ndezja e zjarreve në pyje, djegia e qëllimshme e sipërfaqeve apo mbetjeve bujqësore janë veprime të ndaluara dhe të dënueshme me ligj, por mbi të gjitha ato përbëjnë një dëm të madh ndaj natyrës dhe shëndetit të komunitetit.

Çdo pyll i djegur, çdo hektar i shkatërruar dhe çdo habitat i humbur është një humbje për të gjithë shoqërinë. Natyra kërkon dekada për t’u zhvilluar, ndërsa mund të shkatërrohet brenda pak minutash nga një pakujdesi e vetme.

Agjencia u bën thirrje qytetarëve që të mos ndezin zjarre në pyje, fusha dhe hapësira të hapura, të mos djegin mbetje bujqësore dhe të mos hedhin cigare të ndezura në natyrë. Një shkëndijë e vogël mund të shkaktojë pasoja të mëdha për mjedisin, pronën dhe jetën e njerëzve.

Një moment pakujdesie mund të shkatërrojë natyrën e krijuar për mijëra vite, ndërsa rikuperimi i saj kërkon vite të tëra punë dhe përkushtim. Kujdesi ynë sot është mbrojtje për natyrën dhe siguri për të ardhmen tonë.

/Motilokal.com