Kosova është bërë territori më i ri në Ballkan që i është bashkuar shërbimit Google Street View, duke u mundësuar përdoruesve të eksplorojnë rrugët, qytetet dhe destinacionet turistike të vendit përmes pamjeve 360-gradëshe në Google Maps.

Publikimi vjen pas një procesi rreth dyvjeçar të fotografimit, i zhvilluar nga korriku i vitit 2025 deri në maj të vitit 2026, gjatë të cilit është mbuluar pjesa më e madhe e territorit të Kosovës.

Sipas platformës Virtual Streets, përfshirja e Kosovës në Google Street View ishte shtyrë për shkak të rrethanave të ndërlikuara gjeopolitike dhe çështjeve që lidhen me statusin ndërkombëtar të vendit.

Pamjet e publikuara përfshijnë qytetet kryesore si Prishtina, Prizreni, Peja, Gjakova, Mitrovica, Gjilani dhe Ferizaj, si dhe dhjetëra zona të tjera urbane e rurale, ndër to Podujeva, Fushë Kosova, Novobërda, Kaçaniku, Shtimja, Hani i Elezit, Leposaviqi, Leshaku, Vushtrria dhe Skenderaj.

Përdoruesit tashmë mund të vizitojnë virtualisht edhe disa nga destinacionet më të njohura turistike të vendit, përfshirë Grykën e Rugovës, Parkun Kombëtar të Sharrit, Bjeshkët e Nemuna, si dhe zonat pranë kufijve me Shqipërinë, Malin e Zi dhe Maqedoninë e Veriut.

Fotografimi në Prishtinë nisi në gusht të vitit 2025 dhe vazhdoi edhe gjatë pranverës së vitit 2026. Për realizimin e pamjeve, Google ka përdorur kamera të gjeneratës së katërt, ndërsa në disa lokacione edhe kamera portative, duke mundësuar fotografimin edhe në kushte të vështira atmosferike, përfshirë reshjet e borës gjatë tetorit 2025.

Publikimi i Google Street View konsiderohet një zhvillim i rëndësishëm për promovimin e Kosovës në platformat digjitale, duke rritur dukshmërinë e saj turistike dhe duke krijuar mundësi më të mëdha për bizneset lokale që të prezantohen para vizitorëve nga e gjithë bota.

Ndërkohë, sipas raportimeve, edhe kompania Apple ka marrë leje për fotografimin e pjesëve të territorit të Kosovës, megjithatë pamjet e saj ende nuk janë bërë publike.

/Motilokal.com