Evropa po hyn në valën e katërt të madhe të të nxehtit për këtë vit, pasi një sistem i fuqishëm i presionit të lartë atmosferik, i njohur si "Omega Block", po rikthehet mbi kontinent. Ky konfigurim atmosferik pritet të sjellë temperatura shumë të larta dhe mot të thatë deri në ditët e para të gushtit.

Ky sistem pengon formimin e reve dhe reshjeve, duke lejuar që rrezatimi i fortë diellor të rrisë temperaturat nga dita në ditë. Vala e të nxehtit fillimisht përfshin Gadishullin Iberik, për t'u shtrirë më pas drejt Evropës Perëndimore, Qendrore dhe Lindore.

Nga dita e mërkurë, temperaturat më të larta priten në Francë, Zvicër, jug të Gjermanisë, Itali dhe Austri, ku termometri do të arrijë 35–39°C. Në disa pjesë të Francës jugore dhe Spanjës, temperaturat mund t'i afrohen ose edhe të kalojnë 40°C.

Gjatë së enjtes dhe të premtes, vala e të nxehtit do të zhvendoset drejt Evropës Lindore, duke përfshirë Çekinë, Sllovakinë, Hungarinë, Poloninë, Serbinë dhe Rumaninë. Në këto vende priten temperatura maksimale nga 35 deri në 39°C. Edhe Danimarka dhe jugu i Suedisë do të përjetojnë një periudhë më të shkurtër me temperatura dukshëm mbi normalen.

Në fundjavë, një sistem i dobët atmosferik nga Atlantiku mund të sjellë reshje lokale shiu dhe stuhi në Francë, vendet e Beneluksit, Gjermani, Zvicër dhe më vonë në Poloni. Megjithatë, parashikimet aktuale tregojnë se sistemi i presionit të lartë do të vazhdojë të dominojë, duke mbajtur temperatura mbi mesataren në pjesën më të madhe të Evropës kontinentale edhe gjatë javës së ardhshme.

Sipas parashikimeve afatgjata, muaji gusht pritet të jetë më i nxehtë dhe më i thatë se zakonisht në shumicën e Evropës kontinentale. Ndërkohë, Norvegjia, Ishujt Britanikë dhe pjesë të Skandinavisë veriore pritet të kenë mot më të freskët dhe më me reshje për shkak të ndikimit më të madh të sistemeve atmosferike nga Atlantiku.

Edhe vendet e Ballkanit nuk pritet t'i shpëtojnë kësaj vale të të nxehtit. Shqipëria, Kosova, Maqedonia e Veriut dhe Mali i Zi pritet të përballen me temperatura të larta, mot kryesisht të thatë dhe ditë me vapë intensive gjatë javës së ardhshme. Në disa zona, temperaturat mund të afrohen ose të kalojnë 40°C, ndërsa mundësia për reshje do të mbetet e ulët, përveç ndonjë stuhie lokale të izoluar në zonat malore.

/Motilokal.com