Fluksi i vizitorëve të huaj drejt Shqipërisë vijon të rritet, duke konfirmuar një sezon të fortë turistik edhe gjatë vitit 2026. Vetëm në muajin korrik, vendi regjistroi rreth 2 milionë hyrje të shtetasve të huaj.

Sipas të dhënave të INSTAT, gjatë korrikut 2026 u regjistruan 1 955 099 hyrje të shtetasve të huaj, 7,1% më shumë se në të njëjtin muaj të vitit të kaluar, kur shifra ishte 1 825 490.

Tendenca pozitive është e dukshme edhe në bilancin e shtatë muajve të parë të vitit. Nga janari deri në korrik, Shqipëria regjistroi 7 014 168 hyrje të shtetasve të huaj, duke shënuar një rritje prej 6,5% krahasuar me të njëjtën periudhë të vitit 2025.

Evropa mbetet tregu kryesor për Shqipërinë. Vetëm gjatë korrikut u regjistruan 1 833 396 hyrje nga vendet evropiane. Pjesën më të madhe e zënë shtetasit nga Evropa Jugore, me 1 178 557 hyrje.

Më pas renditen Evropa Qendrore dhe Lindore me 231 450 hyrje, Evropa Perëndimore me 224 975 dhe Evropa Veriore me 132 728 hyrje.

Ndërkohë, të dhënat sinjalizojnë edhe një prani në rritje të vizitorëve nga tregje jashtë kontinentit. Në korrik u regjistruan 67 928 hyrje nga Amerika, 16 723 nga Azia Lindore dhe Paqësori, 9 041 nga Afrika dhe 6 487 nga Azia e Jugut.

Pjesa dërrmuese e hyrjeve lidhet me udhëtime personale. Sipas INSTAT, 99% e hyrjeve të shtetasve të huaj në korrik ishin për qëllime personale, një kategori që u rrit me 7,3% në raport me korrikun e vitit 2025. Në të kundërt, hyrjet për arsye biznesi dhe profesionale ranë me 8,9%.

Në total, gjatë korrikut në territorin shqiptar u regjistruan 2 826 615 hyrje të shtetasve shqiptarë dhe të huaj, 6,1% më shumë se një vit më parë.

Shifrat e reja tregojnë se Shqipëria po ruan ritmin pozitiv të vizitave ndërkombëtare, ndërsa numri i lartë i hyrjeve të turistëve të huaj mbetet një nga treguesit kryesorë të performancës së sezonit turistik 2026.

/Motilokal.com