Italia mund të përballet së shpejti me valën e gjashtë të të nxehtit afrikan të këtij sezoni. Sipas La Repubblica, ditët e para të shtatorit mund të sjellin disa reshje shiu dhe stuhi të izoluara, kryesisht në zonat malore, por kjo pritet të jetë vetëm një pauzë e shkurtër para rikthimit të temperaturave të larta.

Ekspertët parashikojnë se temperaturat do të qëndrojnë mbi mesataret e zakonshme për këtë periudhë. Në Romë, termometrat mund të ngjiten sërish në 36-37°C, ndërsa nga e enjtja situata mund të ndryshojë ndjeshëm.

Sipas medias italiane, mbi Itali dhe pjesë të mëdha të Evropës mund të shtrihet një “Heat Dome”, ose kupolë nxehtësie, që do të favorizojë rritjen e temperaturave. Përveç Italisë, vala e nxehtësisë mund të prekë edhe Gjermaninë, Zvicrën, Francën dhe Austrinë.

Gjatë fundjavës, anticikloni afrikan pritet të forcohet dhe të dominojë motin në pjesën më të madhe të territorit italian. Edhe veriu i vendit nuk do të mbetet i paprekur nga kjo anomali termike.

Në Milano, temperaturat mund të arrijnë deri në 36°C. Nëse këto vlera konfirmohen, ato do të ishin jashtëzakonisht të larta për muajin shtator dhe potencialisht pranë rekordeve historike për këtë periudhë.

Ndërkohë, fillimi astronomik i vjeshtës është më 23 shtator. Meteorologët shpresojnë që netët më të gjata të kësaj periudhe të ndihmojnë në uljen graduale të temperaturave dhe në sjelljen e një freskimi më të qëndrueshëm, pas një vere të karakterizuar nga episode të pazakonta të nxehtësisë.

/Motilokal.com