Në shkretëtirën Atacama të Kilit, e njohur si shkretëtira më e thatë jopolare në Tokë, pranvera ka sjellë një lulëzim të rrallë dhe jashtëzakonisht të fortë lulesh.

Pjesa më e madhe e Atacama-s është e mbuluar me lule pasi fenomeni klimatik El Niño solli shira të rrëmbyeshëm në rajon në fillim të këtij viti.

Një sasi jashtëzakonisht e madhe uji lejoi që miliona fara dhe bulba, shumë prej të cilave kishin qenë në gjendje fjetjeje për dekada, të mbinin dhe të lulëzonin.

Jorge Carabantes, kreu i Departamentit të Zonave të Mbrojtura në Korporatën Kombëtare Pyjore (CONAF), i tha Associated Press se ishte një ngjarje e jashtëzakonshme.

"Është një fenomen unik, ka më shumë se 200 lloje bimësh. Ky është një lulëzim që është qartësisht i jashtëzakonshëm dhe i pazakontë, shumë i ndryshëm nga lulëzimet e tjera që ndodhin diku tjetër në planet", tha ai.

Shkretëtira Atacama ndodhet midis Oqeanit Paqësor dhe Andeve dhe shtrihet për rreth 1,600 kilometra përgjatë bregdetit verior të Kilit. Edhe pse lulëzimi është i zakonshëm gjatë kalimit nga dimri në pranverë, këtë vit dunat shkëmbore, kafe, janë transformuar në një qilim shumëngjyrësh me lule të egra në fenomenin historik të Desierto Florido, ose "shkretëtira e lulëzuar".

Midis korrikut dhe gushtit, Kili regjistroi reshje rekord në disa rajone, me nivele që nuk janë parë në disa vende që kur filluan matjet në vitet 1950.

Biologu Cesar Pizarro nga CONAF Atacama deklaroi se në disa vende ranë 160, 180 dhe 190 milimetra shi dhe se shkaku ishte një "super El Nino".

Stuhitë shkaktuan përmbytje, dëme dhe shkatërrime në disa pjesë të Kilit, por në veri ato lejuan që shkretëtira të lulëzojë për herë të parë në histori. Vlerësohet se këtë vit, gati 17,000 kilometra katrorë janë të mbuluara me lule, një sipërfaqe e ngjashme me madhësinë e Rajonit Metropolitan të Santiagos.

Sipas parashikimeve të CONAF, ky mund të jetë Desierto Florido më intensiv dhe më i gjerë që nga viti 1997. Sekretariati Kombëtar i Turizmit pret pothuajse 300,000 qëndrime me netë në rajonin e Atacama-s deri në fund të fenomenit natyror në nëntor.

/Motilokal.com