Vaksina e koronavirusit të Universitetit të Oksfordit/AstraZeneca ka dhënë një mbrojtje deri në 70 për qind të rasteve. Një rezultat i mirë, por jo në nivelin e dy konkurrenteve të tjera, Pfizer dhe Moderna, që deklaruan se ishin efektive deri në 95 për qind të rasteve.

Por vaksina e Oksfordit është shumë më e lirë, kushton vetëm 4 funta për person dhe është shumë më e lehtë për tu ruajtur dhe shpërndarë sesa kandidatët e kompanive amerikane, të cilat duhet të mbahen në temperatura shumë të ftohta në frigoriferë të veçantë.

Provat zbuluan se vaksina është 90 për qind e efektshme në luftimin e virusit vrasës kur administrohet fillimisht si gjysmë doze dhe pastaj një dozë e plotë një muaj më vonë. Kjo bie në 62 për qind kur dikujt i jepen dy doza të plota në muaj me diferencë, nga të dy regjimet e dozimit që rezulton në një mesatare prej 70.4 për qind, tha Universiteti i Oksfordit / AstraZeneca.

Sekretari i Shëndetësisë Matt Hancock përshëndeti rezultatet këtë mëngjes, duke thënë se miliona doza do të jenë gati të shpërndahen deri në fund të dhjetorit. Ai i tha BBC: 'Shpresojmë të jemi në gjendje të fillojmë vaksinimin muajin tjetër. Pjesa më e madhe e programit të shpërndarjes së vaksinave do të jetë në janar, shkurt, mars. Dhe ne shpresojmë që diku pas Pashkëve gjërat të jenë në gjendje të fillojnë të kthehen në normalitet.'

Rezultatet e hershme nga prova gjithashtu sugjerojnë se mund të jetë e mundur të ndalohet transmetimi i virusit edhe në mesin e njerëzve që nuk kanë simptoma të sëmundjes.

Profesori Pollard shtoi se edhe efikasiteti mesatar i 70 për qind është më i mirë se vaksina e gripit, kështu që arritja e 90 për qind tek disa njerëz ishte jashtëzakonisht premtuese.

Kryeministri shkroi në Twitter sot: 'Lajm tepër emocionues, vaksina e Oksfordit ka rezultuar kaq efektive në prova. Ende ka kontrolle të mëtejshme të sigurisë përpara, por këto janë rezultate fantastike. Bravo për shkencëtarët tanë të shkëlqyeshëm në @UniofOxford & @AstraZeneca, dhe të gjithë atyre që dolën vullnetarë në prova'.

Vaksinat e zhvilluara nga  Pfizer  dhe Moderna në SHBA kanë treguar mbrojtje prej 95 për qind - por që të dy duhet të ruhen ndërmjet minus 75 °C dhe minus 20 °C dhe janë më të shtrenjta.

Në muajin gusht, Bashkimi Europian arriti një marrëveshje me AstraZeneca për blerjen e të paktën 300 milionë dozave të vaksinës potenciale kundër COVID-19. Komisioni Evropian, i cili negocioi në emër të 27 vendeve anëtare të BE-së, tha se marrëveshja përfshin mundësinë për të blerë edhe 100 milionë doza shtesë nëse vaksina e kësaj kompanie rezulton e sigurt dhe efektive. Blloku ka njoftuar se do t’u dhurojë vaksina anti COVID -19 nga AstraZeneca vendeve me të ardhura të ulëta dhe të mesme.

Ndër përfitueset e kësaj vaksine dhuratë nga BE-ja është dhe Shqipëria pasi sipas klasifikimit të Bankës Botërore ajo dhe i gjithë rajoni i Ballkanit Perëndimor bën pjesë në vendet me të ardhura të mesme./Motilokal.com