Sipas një raporti të publikuar nga Agjencia Evropiane e Mjedisit (EEA) thuhet se ndotja e ajrit ka ndikuar në vdekjen e parakohshme të 400,000 njerëzve në Evropë në vitin 2016, dhe sipas të dhënave të fundit pothuajse çdo evropian që banon në qytet është i ekspozuar ndaj niveleve të ndotjes që tejkalojnë nivelet e shëndetshme.

"Ndotja e ajrit aktualisht është rreziku më i rëndësishëm mjedisor për shëndetin e njeriut," tha Agjencia Evropiane e Mjedisit (EEA).

Autori i raportit, eksperti i cilësisë së ajrit të EEA Alberto González Ortiz, tha se niveli i grimcave që po bien në qytetet evropiane është i rrezikshëm.

"Ende nuk janë arritur standardet e BE-së dhe natyrisht nuk jemi larg nga arritja e standardeve të Organizatës Botërore të Shëndetësisë (OBSH)", tha Ortiz.

Ligji i BE-së aktualisht kërkon nga vendet evropiane të vlerësojnë nivelin, veçanërisht në zonat urbane dhe të ndërmarrin veprime të menjëhershme.

Ndotja nga grimcat në qytete evropiane është bërë objektiv i kufizimeve më të ashpra pasi gjykata e lartë e BE-së vendosi se të gjitha qytetet duhet të veprojnë nëse nivelet e ndotjes tejkalojnë në një pikë të vetme të zezë sesa në bazë të një mesatareje në të gjithë rajonin.

Transporti rrugor, termocentralet, industria dhe bujqësia ishin ndër burimet kryesore të ndotësve të ajrit”, tha agjencia. Sipas saj, dëmi më i madh vjen nga ndotja e grimcave të ajrit dhe dioksidi i azotit.

Ulja e numrit të makinave është një faktor i rëndësishëm për uljen e ndotjes së ajrit në qytete evropiane, veçanërisht të dioksidit të azotit, tha Ortiz.

"Kur luftojmë ndotjen, ne gjithashtu luftojmë ndryshimin e klimës, si dhe zhurmën dhe promovojmë një jetë më të shëndetshme", shtoi ai. /Motilokal.com