Një stuhi masive bore ka pushtuar bregdetin lindor të SHBA-së, duke ndërprerë fluturime, duke mbyllur vendet e vaksinimit dhe duke e sjellë New York City në një ngërç.

Nga e hëna pasdite, 48 cm dëborë ka rënë në New Jersey dhe Pennsylvani dhe 43 cm në New York City.

New York City dhe New Jersey kanë shpallur të dy gjendjen e jashtëzakonshme.

Shërbimi Kombëtar i Motit i SHBA-së tha se stuhia do të ngjitet në New England, përpara se të tërhiqet të martën.

Shpejtësi ere deri në 80 km / orë parashikohen për disa ditë duke krijuar një stuhi dëbore verbuese.

Stuhia ka shkatërruar udhëtimet lokale. Kryebashkiaku i New York City Bill de Blasio lëshoi një urdhër që kufizonte udhëtimin jo-thelbësor nga ora 06:00 me orën lokale të hënën dhe mbylljen e shkollave publike të martën.

Guvernatori i shtetit të New York-ut Andrew Cuomo shpalli një gjendje të jashtëzakonshme në qytetin e New York-ut, si dhe 44 qarqe të tjera.

“Kjo është një situatë e rrezikshme,” tha ai në një konferencë shtypi të hënën. “Një situatë kërcënuese për jetën. Do të përkeqësohet më tej.”

Ndërsa Çikago ka regjistruar më shumë se 20 centimetra borë, mëngjesin e të hënës, ç’ka çoi në anulimin e disa qindra fluturimeve në dy aeroportet e qytetit.

Në New Jersey, Guvernatori Philip Murphy pezulloi operacionet e autobusëve dhe hekurudhave. Urdhri i tij i urgjencës lejon autoritetet të mbyllin rrugët dhe të evakuojnë shtëpitë.

Skuadrat e emergjencave janë mobilizuar në mënyrë që të përballojnë stuhinë dhe i kanë kërkuar të gjithë nju jorkezëve të qëndrojnë larg rrugëve sa më shumë që të jetë e mundur. Në Uiskonsin ndërkohë, trashësia e borës ka shkuar në disa zona në mbi 38 centimetra.

Më shumë se 1600 fluturime janë anuluar në aeroportet kryesore si pasojë e motit të ligë.

Stuhia gjithashtu ka ndaluar shpërndarjen e vaksinave në Connecticut, New Jersey, Rhode Island, Filadelfia, pjesë të Uashingtonit, DC.

Në Uashington DC, banorët kanë shijuar borën përpara monumenteve ikonike të kryeqytetit.

Pemët, fushat dhe ndërtesat në Baltimorë janë mbuluar po ashtu me borë me autoritetet që paralajmërojnë për kushte të vështira në rrugë dhe më shumë reshje bore dhe shiu gjatë natës. Merilendi ndërkohë është në alarm për borën që nga e diela./Motilokal.com