Kompania Rajonale e Ujësjellësit “Gjakova”, ka njoftuar se pas reshjeve të ditëve të fundit, liqeni i Radoniqit ka arritur kuotën maksimale në lartësinë mbidetare 456.00 metra.

“Mbrëmë me 7 shkurt 2021, Liqeni i Radoniqit arriti kuotën maksimale në lartësinë mbidetare 456.00 m. Liqeni për momentin ka afër 118 milion metër kub ujë. Ky është edhe objektivi jonë i përvitshëm i cili sivjet u arrit për një afat rekord, falë angazhimit të gjithë stafit punues, mbikëqyrur personalisht nga Kryeshefi Ekzekutiv i KRU "Gjakova" Ismet Ahmeti”, thuhet në njoftim.

Më tej në njoftim thuhet se furnizimi i liqenit  ka qenë konstant nga kanali derivues me sasi të bollshme të ujit.

“Pas thatësirave që kanë mbretëruar viteve të fundit kjo periudhë na dha sasi të mjaftueshme të reshjeve ku vetëm në muajin janar janë matur në Stacionin e Filtrimit 340 litra reshje shiu e bore për m2”, njofton ujësjellësi “Gjakova”.

Sipas trendit të reshjeve viti 2021 nuk parashihet të ketë probleme me ujë në tërë regjionin tonë dhe po ashtu edhe për furnizim me ujë të pijes.

“Por gjithsesi apelohet të kursehet uji në përgjithësi sepse begatia e reshjeve si këtë vit, zakonisht ndodhë të ketë shumë rrallë”, apelohet në njoftim./Motilokal.com