Një kompani e quajtur Platio prodhon panele diellore nga mbeturinat plastike - dhe më pas i përdor ato si trotuare.

Kjo kompani me seli në Hungari, mund të furnizojë me energji ndërtesat dhe pajisjet elektronike përmes gjurmëve të njerëzve. Sa më shumë që ecni në panelet diellore, aq më shumë ato gjenerojnë energji.

Trotuaret japin energjinë diellore "në vendet ku nuk ishte e mundur më parë", thotë bashkëthemeluesi i Platio, Miklós Illyés.

Illyés është një nga tre hungarezë që erdhën me këtë ide në vitin 2015.

Atëherë si funksionon?

Duke përdorur një metodë të veçantë presioni, Platio mund të përdorë plastikë të riciklueshme për të ndërtuar tullat në të cilat panelet diellore ulen.

Kompania thotë se përdor ekuivalentin e 400 shisheve plastike për të bërë një metër katror të trotuarit diellor. Pretendon se kjo përzierje krijon tulla më të qëndrueshme sesa disa materiale të tjera në industrinë e ndërtimit të rrugëve.

Dhe megjithëse është menduar për njerëzit dhe jo për automjetet, trotuari mund "të mbajë lehtë peshën edhe të një kamioni të rëndë", siguron Illyés.

U deshën disa vjet, por tani produkti është i disponueshëm në 36 vende.

"Produkti ynë nuk është bërë për të zëvendësuar panelet diellore tradicionale në çati, për shembull, por për të qenë një përpjekje plotësuese për të përdorur energji të pastër atje ku burimet e tjera të energjisë nuk janë të disponueshme", thotë Illyés.

"Është shumë interesante që në SHBA, për shembull, ka disa vende në shtetet jugore ku për shkak të kërcënimit nga tornado është e vështirë të instalosh një panel diellor. Dhe nëse mund të instalojmë panele diellore në këto vende, ne gjithashtu mund të rritim prodhimin e energjisë së gjelbër".

Një njësi e panelit diellor siguron rreth 20 Vat energji. Dhe një sipërfaqe prej 20-30 metra katrorë mund të sigurojë energji të mjaftueshme për një shtëpi familjare në klimën Hungarisë.