Parku Kombëtar Shebenik-Jabllanicë mbetet një destinacion turistik i jashtëzakonshëm për t’u frekuentuar në të katër stinët, por në veçanti në stinën e verës.
Simboli i këtij vendi është liqeni, i cili ndodhet përballë fshatit, rrëzë pyllit të ahut. Pylli dhe peizazhi përreth liqenit ofrojnë një pamje piktoreske dhe mjaft tërheqëse për turistët që vizitojnë këtë anë.
Ndonëse i vendosur në 1100 metra lartësi mbidetare, gjatë ditëve të nxehta të verës, shumë nga vizitorët freskohen me ujin e pastër dhe të ftohtë të liqenit.
Sa i përket pozicionit gjeografik, pasurive natyrore, traditave dhe kulturave, ky vend mundëson një turizëm të veçantë. Turistët në Fushë-Studën mund të shijojnë shumë gjëra, si peshkimin, ecjet sportive të notojnë në ujërat e pastra të liqenit dhe shumë atraksione të tjera që ofron kjo hapësirë.
Ky liqen furnizohet nga reshjet e shiut dhe burimet e ndryshme tokësore dhe nëntokësore. Gjatë muajve të pranverës dhe të vjeshtës, niveli i ujit rritet dukshëm.
Në Shebenik turistët kanë mundësi të shijojnë liqenet karstike, liqenin e Fushë-Studës, Vlaskën, Fushën e Dorëzit, Bredhin e Fushë-Kuqes, Rrapin e Taksimit, Shkallën e Skënderbeut, Gurrën e Ariut e shumë zona të tjera që presin vizitorë.
Moratoriumi i gjuetisë ka bërë që edhe kafshët e egra të shtohen për t’i dhënë më tepër gjallëri kësaj zone./Motilokal.com