Kompania IBM paraqiti në Gjermani të martën një nga kompjuterët më të fuqishëm kuantikë të Evropës, duke reklamuar përpjekjet e vendit për të qenë konkurrentë në atë që konsiderohet të jetë një nga teknologjitë kryesore të së ardhmes.

Kompjuterët kuantikë përdorin grimca më të vogla se atomi për të kapërcyer kufizimet e fizikës tradicionale dhe për të kryer përllogaritje me shpejtësi shumë më të lartë se edhe superkompjuterët më të shpejtë ekzistues.

Ndërsa është konsideruar prej kohësh si një sferë hulumtimesh misterioze, kompanitë gjithnjë e më shumë po shpresojnë të përdorin kompjuterë kuantikë për të zhvilluar materiale të reja, ilaçe apo aplikime të inteligjencës artificiale.

Sistemi i ri i IBM-së është kompjuteri i parë kuantik jashtë Shteteve të Bashkuara, ku kompania ka tashmë më shumë se 30 kompjutera të tillë, shkruan VOA.

Ai është vendosur në një strukturë në Ehningen, që drejtohet nga Shoqata Kërkimore gjermane Fraunhofer.

"Kompjuterët kuantikë kanë potencialin të zgjidhin kategori të reja problemesh që nuk mund të arrihen të zgjidhjen edhe nga kompjuterët më të fuqishëm konvencionalë sot. Ilaçe dhe materiale të reja, modele më të sakta të motit, bateri që mund të jenë një mijë herë më të fuqishme, plehra kimike që kërkojnë më pak energji", thotë Arvind Krishna, kreu dhe drejtori ekzekutiv i kompanisë IBM.

IBM-ja thotë se sistemi në Ehningen mund të procesojë 27 bit kuantikë, apo kubits në të njëjtën kohë.

Por Martin Jetter, kreu i kompanisë për Evropën, Lindjen e Mesme dhe Afrikën, thotë se IBM-ja synon të ketë një kompjuter kuantik të qëndrueshëm, të aftë për të procesuar më shumë se 1.000 kubits deri në vitin 2023.

"Sistemi tradicional i përllogaritjeve ka një fund dhe ai nuk mund të plotësojë më sfidat që paraqet bota, inovacionet e reja janë të nevojshme", tha Martin Jetter.

Qeveria gjermane njoftoi muajin e kaluar se ka në plan të investonte rreth 2 miliardë euro në fushën e kërkimeve të teknologjisë kuantike deri në vitin 2025./Motilokal.com