Prodhuesi i pajisjeve bujqësore John Deere ka zbuluar traktorin e tij të parë të automatizuar që mund të punojë pa shofer.

Ky traktor mund të aktivizohet nga një telefon inteligjent, duke përdorur kamera dhe sensorë për të vepruar në tokën bujqësore.

E veçanta e këtij traktori është se automatizimi vjen si një komplet funksionesh që mund të shtohen në disa traktor ekzistues.

John Deere ende nuk ka vendosur nëse do ta shesë kompletin drejtpërdrejt dhe po shqyrton një model qiraje ose abonimi.

Ndërkaq, nuk është kompania e parë që shfaq teknologjinë e automatizuar të traktorëve, por është ndër prodhuesit më të mëdhenj të pajisjeve bujqësore në botë.

Kompleti i ri i prezantuar në ekspozitën e teknologjisë CES përdor gjashtë kamera për të monitoruar rrethinën, duke përdorur mësimin makinerik për të zbuluar objektet dhe për të shmangur përplasjet.

Por siguria mbetet një shqetësim kryesor. Shumë lëndime në fermë shkaktohen nga pajisjet e rënda. Të dhënat nga Ekzekutivi i Shëndetit dhe Sigurisë në Mbretërinë e Bashkuar, për shembull, tregojnë se goditja nga një automjet në lëvizje ishte shkaku më i zakonshëm i lëndimeve fatale në bujqësi, pylltari dhe peshkim në 2020-2021.

Bujqësia mbetet shumë më e rrezikshme se sektorët e tjerë të punësimit, me lëndime fatale për 100,000 punëtorë rreth 20 herë më të larta se mesatarja në të gjithë sektorët.

Traktorët e automatizuar dhe pajisjet e tjera të fermës e largojnë fermerin nga afërsia e makinerive të rënda, por gjithashtu mbështeten në aftësinë e teknologjisë për të zbuluar rreziqet e mundshme.

Kompania thotë se ka testuar teknologjinë për tre vjet, përpara zbulimit të saj zyrtar, në fermat e botës reale.

John Deere i tha Reuters se planifikonte një nisje "me vëllim të ulët" të teknologjisë së re, duke shitur vetëm 12 deri në 20 traktor këtë vit.

Kompania gjithashtu ka qenë më parë nën kritika për zhvillimet e saj teknologjike, për të cilat disa fermerë kanë argumentuar se e bëjnë shumë më të vështirë riparimin e pajisjeve të tyre./Motilokal.com