Avioni më i madh i pasagjerëve në botë u përdor për të testuar karburantet e qëndrueshme të avionëve.

Bëhet fjalë për një avion Airbus A380, i cili fluturoi duke përdorur karburant të bërë nga vaji për gatim. Airbus bëri fluturimin e parë të A380-it të tij duke përdorur 100 për qind karburant të rinovueshëm të avionit (SAF), i cili rrjedh kryesisht nga vaji ushqimor dhe yndyrat e tjera të mbeturinave.

A380, i quajtur MSN 1 "Tank" nga SAF, u ngrit nga aeroporti Blagnac në Toulouse, Francë më 25 mars dhe kaloi tre orë në fluturim. Motori i tij Rolls-Royce Trent 900 përdorte karburant të qëndrueshëm.

Fluturimi i dytë u krye më 29 mars me qëllim testimin e ngritjes dhe uljes me përdorimin e karburanteve të qëndrueshme. Ky ishte lloji i tretë i aeroplanit Aribus që fluturoi duke përdorur 100 për qind SAF në një vit, por është larg nga më i madhi. Në mars 2021, Airbus përdori A350 për të testuar karburant të qëndrueshëm, dhe më pas A319neo në tetor 2021.

Për fluturimin e parë të këtij muaji të A380, Airbus përdori 27 ton SAF të papërzier të siguruar nga TotalEnergies, dhe karburanti përbëhej kryesisht nga vaj ushqimor dhe yndyra të tjera të mbeturinave.

SAF ka treguar potencial të madh për reduktimin e emetimeve në industrinë e aviacionit, e cila përbën rreth 2 për qind të totalit të emetimeve globale në vit. Kompani të tjera duke përfshirë Rolls-Royce po kryejnë gjithashtu teste me synimin që motorët e tyre të përdorin karburant të qëndrueshëm në të ardhmen.

Të gjithë avionët e Airbus tashmë kanë një certifikatë për përdorimin e 50 për qind të SAF të përzier me vajguri, por qëllimi i kompanisë është të bëjë një hap përpara dhe të marrë një certifikatë për përdorimin e SAF ekskluzivisht deri në vitin 2030.

Në Airbus, ata besojnë se SAF është mënyra kryesore për të arritur zero emetime karboni nga trafiku ajror deri në vitin 2050.

Në vitin 2019, Airbus njoftoi ndërprerjen e prodhimit të A380, avionit më të madh në botë, për shkak të kërkesës së ulët dhe kostove të larta të prodhimit. Shumë prej avionëve ekzistues janë ende funksionalë, por Airbus i sheh ata si idealë për testimin e teknologjive të qëndrueshme për shkak të brendësisë së tyre të gjerë. Për shembull, në shkurt, Airbus njoftoi se synon të pajisë A380 me motorë hidrogjeni dhe t'i testojë ato në vitin 2026./Motilokal.com