SpaceX dhe NASA janë në fazën përfundimtare të përgatitjes për të dërguar një ekuipazh në Stacionin Ndërkombëtar të Hapësirës.

Ky është misioni Crew-4, i cili do të nisët më 23 prill dhe përfshin dërgimin e katër astronautëve në orbitë. Ekuipazhi do të vendoset në një kapsulë Crew Dragon të montuar në majë të raketës Falcon 9 të SpaceX dhe nisja do të bëhet nga Qendra Hapësinore Kennedy nga platforma e lëshimit 39A.

ISS do të jetë i mbushur me njerëz pasi ekuipazhet e misioneve Ax-1 dhe Crew-3 janë ende në stacionin hapësinor.

Ekuipazhi i Crew-4 ka kryer një test gatishmërie shtatë-orëshe më 15 prill dhe nuk ka pasur probleme të mëdha dhe është pothuajse gati për të fluturuar. Janë identifikuar vetëm çështje të vogla që do të zgjidhen së shpejti.

Ekuipazhi i Crew-4 do të udhëtojë me një kapsulë të re të Crew Dragon të quajtur Freedom, e bërë nga SpaceX. Ajo do të jetë gjithashtu kapsula e fundit për kompaninë, pasi fokusi është zhvendosur në zhvillimin e raketës Starship, e cila do të përdoret për misionet në Mars.

Ekuipazhi i Crew-4 përbëhet nga Jessica Watkins, Robert Hines, Kjell Lindgren dhe Samantha Cristoforetti nga Agjencia Evropiane e Hapësirës.

Kjo do të jetë hera e gjashtë që SpaceX dërgon një ekuipazh në ISS.

Ekuipazhi i misionit Ax-1 tashmë duhej të kthehej nga ISS, por kthimi u shty për të martën për shkak të motit të ligë. ISS ka ende astronautët e misionit Crew-3 që kthehen në Tokë në fund të prillit./Motilokal.com