Një stuhi e fortë rëre ka goditur disa rajone në Irak, ndërsa qindra qytetarë kanë kërkuar ndihmë mjekësore për probleme me frymëmarrjen.

Stuhia e rërës nga dita e djeshme ka qenë aktive në një sërë qytetesh të Irakut, përfshirë kryeqytetin Bagdad.

Situata më e vështirë është në provincën e Salahaddinit, ku sot 219 banorë vendas kanë kërkuar ndihmë mjekësore në spitale. Shumica prej tyre pas ndihmës janë larguar për trajtim në shtëpi.

Amer al-Jabri, i zyrës meteorologjike të Irakut, tha më parë se fenomeni i motit pritet të bëhet gjithnjë e më i shpeshtë "për shkak të thatësirës, shkretëtirëzimit dhe rënies së reshjeve".

Iraku është veçanërisht i prekshëm ndaj ndryshimeve klimatike, duke qenë tashmë dëshmitar i reshjeve rekord të ulëta dhe temperaturave të larta në vitet e fundit.

Ekspertët kanë thënë se këta faktorë kërcënojnë të sjellin fatkeqësi sociale dhe ekonomike në vendin e plagosur nga lufta.

Në nëntor, Banka Botërore paralajmëroi se Iraku mund të pësojë një rënie prej 20% të burimeve ujore deri në vitin 2050 për shkak të ndryshimeve klimatike.

Në fillim të prillit, Issa al-Fayad, një zyrtar i ministrisë së mjedisit, kishte paralajmëruar se Iraku mund të përballet me "272 ditë pluhuri" në vit në dekadat e ardhshme, sipas agjencisë shtetërore të lajmeve INA.

Ministria tha se fenomeni i motit mund të trajtohet duke “rritur mbulesën e bimëve dhe krijimin e pyjeve që veprojnë si erëra”./Motilokal.com