Shkencëtarët nga Zyra Meteorologjike e Mbretërisë së Bashkuar, kanë bërë një parashikim të ri, ku tregon se gjasat që planeti të shkelë temperaturën e pragut prej 1.5 gradë Celsius mbi nivelet para-industriale, mbi të cilat do të ishin dëme të pakthyeshme në ekosistemet e Tokës dhe ndikime shkatërruese në jetën e njerëzve, kafshëve dhe bimëve po rritet.

Probabiliteti që planeti të kalojë 1.5 gradë Celsius në një nga pesë vitet e ardhshme është rritur në 50 për qind, nga 20 për qind në 2020 dhe 40 për qind vitin e kaluar, raportoi The Guardian.

Në vitin 2015, nuk kishte asnjë mundësi të parashikuar që të ndodhte. Atë vit, temperatura mesatare globale arriti fillimisht 1 gradë Celsius mbi nivelet e matura në mesin e shekullit të 19-të, raportoi BBC News. Vitin e kaluar, temperatura mesatare globale ishte 1.1 gradë Celsius më e lartë se temperaturat e regjistruara midis viteve 1850 dhe 1900.

“Shifra 1.5 gradë Celsius nuk është ndonjë statistikë e rastësishme. Është më tepër një tregues i pikës në të cilën ndikimet klimatike do të bëhen gjithnjë e më të dëmshme për njerëzit dhe në të vërtetë për të gjithë planetin”, tha profesor Petteri Taalas, i cili është kreu i Organizatës Botërore Meteorologjike, e cila publikoi raportin e ri.

Ekziston gjithashtu një shans 93 për qind që deri në vitin 2026 të tejkalohet rekordi i vendosur në 2016 për vitin më të nxehtë të regjistruar ndonjëherë.

“Për sa kohë që ne vazhdojmë të lëshojmë gazra serrë, temperaturat do të vazhdojnë të rriten”, tha Taalas.

"Dhe krahas kësaj, oqeanet tona do të vazhdojnë të bëhen më të ngrohta dhe më acid, akulli i detit dhe akullnajat do të vazhdojnë të shkrihen, niveli i detit do të vazhdojë të rritet dhe moti ynë do të bëhet më ekstrem."

Ndërsa kriza klimatike vazhdon të përkeqësohet, temperatura mesatare gjatë pesë viteve të ardhshme gjithashtu do të jetë pothuajse padyshim më e lartë se pesë vitet e mëparshme.

"Një vit i vetëm tejkalimi mbi 1.5 gradë Celsius nuk do të thotë se ne kemi shkelur pragun ikonik të Marrëveshjes së Parisit, por zbulon se ne po i afrohemi gjithnjë e më shumë një situate ku 1.5 gradë Celsius mund të tejkalohet për një periudhë të zgjatur", tha dr. Leon Hermanson i Zyrës Met në Mbretërinë e Bashkuar.

Gjatë pesë viteve të ardhshme, efektet e ngrohjes globale ka të ngjarë të prekin rajonin e Arktikut më shumë se pjesën tjetër të planetit, thanë shkencëtarët. Aty diferencat e temperaturës nga mesatarja historike do të jenë tre herë më të mëdha.

“Ngrohja e Arktikut është në mënyrë disproporcionale e lartë dhe ajo që ndodh në Arktik na prek të gjithëve”, tha Tallas.

Shqetësues është edhe parashikimi i reshjeve për këtë vit, pasi kushtet parashikohen të jenë më të thata për Evropën Jugperëndimore dhe Amerikën e Veriut, ndërsa Australia, Evropa Veriore, Brazili verilindor dhe rajoni Sahel i Afrikës pritet të kenë kushte më të lagështa.

"Mundësia e tejkalimit të pragut 1.5 gradë Celsius, qoftë edhe vetëm për një vit, është shqetësuese", theksoi dr. Andrew King nga Universiteti i Melburnit.

“Emetimet tona të gazeve serrë janë ende në nivele gati rekord dhe derisa të zbresim emetimet në zero neto, do të vazhdojmë të shohim ngrohjen globale. Reduktimet e shpejta dhe drastike të emetimeve janë të nevojshme urgjentisht.”/Motilokal.com