Miliona kinezë po përgatiten për mot edhe më të nxehtë këtë fundjavë pasi shumë qytete lëshuan alarmin e kuqe, paralajmërimi më i lartë i mundshëm i nxehtësisë.

Sipas Administratës Meteorologjike të Kinës, temperaturat në 19 qytete në provincat lindore të Zhejiang dhe Fujian pritet të kalojnë 40 gradë Celsius në 24 orët e ardhshme.

208 qytete dhe qarqe të tjera në të gjithë Kinën janë nën alarmin portokalli, paralajmërimi i dytë më i lartë i nxehtësisë që tregon temperatura mbi 35 gradë Celsius.

Ky paralajmërim mbulon pjesë të Kinës jugore dhe lindore, duke përfshirë Jiangxi, Hunan, Guangdong, Guangxi dhe disa nga provincat e Anhui dhe Henan.

Vala e të nxehtit përkon me “Vapën e Madhe” të shtunën, tradicionalisht dita më e nxehtë e vitit, sipas kalendarit hënor kinez.

Kina është duke luftuar me temperatura të larta të vazhdueshme që nga qershori, me një temperaturë mesatare prej 22.1 gradë Celsius, më e larta që nga viti 1961, sipas Qendrës Kombëtare të Klimës së Kinës.

Javët e fundit, të paktën 71 stacione kombëtare të motit në të gjithë Kinën kanë regjistruar temperatura rekord. Tre qytete në provincën qendrore të Hebeit dhe një në provincën jugperëndimore të Yunnan panë temperaturat që arritën 44 gradë Celsius.

Observatori Qendror Meteorologjik i Kinës ka këshilluar njerëzit që të shmangin aktivitetet në natyrë, të shkurtojnë orët e punës dhe të marrin masa mbrojtëse kundër goditjes së nxehtësisë gjatë periudhave të nxehta.

Vdekshmëria e lidhur me valët e të nxehtit në Kinë është rritur në mënyrë dramatike që nga viti 1990, duke arritur në 26,800 vdekje në vitin 2019, sipas një studimi të Lancet të publikuar në 2020.

Në fillim të këtij viti, qeveria kineze publikoi një dokument të ri politikash për të përmirësuar reagimin e saj ndaj ndryshimeve klimatike, për të cilat tha se jo vetëm po krijon sfida afatgjata, por gjithashtu e bën vendin më të prekshëm ndaj ngjarjeve "të papritura dhe ekstreme" si valët e të nxehtit, thatësira dhe përmbytjet.

“Ndryshimi i klimës ka sjellë tashmë ndikime serioze negative në sistemin natyror ekologjik të Kinës dhe ka vazhduar të përhapet dhe të depërtojë në ekonomi dhe shoqëri”, tha qeveria në strategjinë e saj kombëtare të përshtatjes ndaj ndryshimeve klimatike.

Ajo u zotua ta bëjë Kinën një "shoqëri rezistente ndaj klimës" deri në vitin 2035, duke ndërtuar një sistem mbarëkombëtar për të monitoruar dhe vlerësuar rreziqet klimatike dhe duke rritur aftësitë e paralajmërimit të hershëm./Motilokal.com